Verhaölke
Joekskepél “de Eierjônge” besteit viéfendertig jaor. Det beteikent det dae van Tiéuwe begint te dauwe:” d’r mót waer ein book kômme.” En dao mót inkômme wae se bis en waorum. En waorum se beej de Eierjônge bis gekômme en waorum néet. En of ut leuk waas en wanniër néet. En auk nog ein anekdote hat hae gaer. Dae haet goot lölle. Dae van Thiëwe. Terwiel weej al twië beük hebbe wao det allemaol in steit !! Maar good. Laot um maar.
Ik heit Jan. Net zoë als die andere viëf . Ik bin al vanaaf ut iërste begin d’r beej. Neet altiëd zônne draufgenger huur!. Toen ik heej in Bree kwaam woëne en werke, woord ik door eine collega gevraog of ik gen zin had um met ein paar andere ein joekskepel te beginne. Ik woel det waal. Wie det allemaol ging en wao en wae, det zal ongetwiëfeld örges anders in dit book oëtgelach waere. In idder geval begôs ik te traöte op ein feep oftewaal ein klarinet. Ik heb d’r noow nog teije lônge van. Veural in ut begin heb ik mich te barste geblaoze maar d’r kwaam niks oët die toët ! Allein gepiëp en kattegejammer. Maar det huürde ik in mien umgaeving auk. Dus ik veel neet zoë op. Weej begôste met nummer als “Blijf mij nabij” (Bliëf dich beej mich) , Finlandia (Finland), en Heej in Bree (Jiëp, Jiëp, Jiëp) en zoë. Gaonde de waeg stapde weej euver op ein miër gangbaar rippertwaar. Die nummers woorde door de inmiddels opgerichte muziekkemmissie oëtgezôch. Beej die kemmissie bin ik euveriges noëts gewaes. Woel ik auk neet, want als se dao beej bis wuürs se hiëlemaol van Lottum. Noëits is ut good. Nae, dao zitte allein jônge in die verstand höbbe van muziëk of die ein plank veur de kop hebbe of eine harde kop hebbe en zoë.
Bizônder gruüts bin ik op ut feit det ik jaorelang lid bin gewaes van de VEKK. De Vastelaovund en Kleijer Kemissie. Auk hiel erg belangriëk. Weej môste namelik oëtzeuke wat weej meuste aanpoengele met d’n optóch. Det waar dök ein hiel gestrés. Veural de iërste gas jaor. Geej kint op alde fotoos zeën det weej zoëwat alles zien gewaes..Van kloon tot doëvemelker,zal ik maar zegge. Jao det waar ein belangrieke kemissie. Jammer det we die neet miër hebbe.
Ein andere, auk hiel belangriëke, kemissie wao ik tot noow toe in zit, is de kaskemissie. Weej, Dreese en ik kontrolere de kas. Det doon wee ein kiër per jaor. Ein paar daag veur de jaorvergadering. Beej de penningmeister toës. Naodet weej de nieje inrichting van de penningmeister hebbe bewônderd waere weej d’n hiële aovund in de watte gelag. Weej beginne met kôffie met vlaai. (Riëste of bôtter). Daonao bëer met allerlei hepkes, kiëskes en bitterballe. Meistal haet de kemissie de tesse vol wanniër de jaoreuverzichte geteikend môtte waere. Ein belangrieke kemissie.
Schaele wazele, serieuze gesprekke euver vanalles en nog wat, ein glaas beer met einen bórrel. (van elske, naor eine jônge, en noow eine kaorewiën)
Straevele en altiëd geliëk hebbe.
Lache ,soms bäöke.
Praote en soms zwiëge.
En noow môt dae van Thiëwe (Bookend) auk nog weite waat ik nou leuk vind aan de Eierjônge.
Nou, det dus.